Midrash Aggadah (Buber) Vayikra 9 – מדרש אגדה (בובר) ויקרא ט‏ – Mikraot Gedolot

(א) {פרשת שמיני} וַֽיְהִי֙^א בַּיּ֣וֹם הַשְּׁמִינִ֔י קָרָ֣א מֹשֶׁ֔ה לְאַהֲרֹ֖ן וּלְבָנָ֑יו וּלְזִקְנֵ֖י יִשְׂרָאֵֽל׃ (ב) וַיֹּ֣אמֶר אֶֽל⁠־אַהֲרֹ֗ן קַח⁠־לְ֠ךָ֠ עֵ֣גֶל בֶּן⁠־בָּקָ֧ר לְחַטָּ֛את וְאַ֥יִל לְעֹלָ֖ה תְּמִימִ֑ם וְהַקְרֵ֖ב לִפְנֵ֥י יְהֹוָֽהי״יֽ׃ (ג) וְאֶל⁠־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר קְח֤וּ שְׂעִיר⁠־עִזִּים֙ לְחַטָּ֔את וְעֵ֨גֶל וָכֶ֧בֶשׂ בְּנֵי⁠־שָׁנָ֛ה תְּמִימִ֖ם לְעֹלָֽה׃ (ד) וְשׁ֨וֹר וָאַ֜יִל לִשְׁלָמִ֗ים לִזְבֹּ֙חַ֙ לִפְנֵ֣י יְהֹוָ֔הי״י֔ וּמִנְחָ֖ה בְּלוּלָ֣ה בַשָּׁ֑מֶן כִּ֣י הַיּ֔וֹם יְהֹוָ֖הי״י֖ נִרְאָ֥ה אֲלֵיכֶֽם׃ (ה) וַיִּקְח֗וּ אֵ֚ת אֲשֶׁ֣ר צִוָּ֣ה מֹשֶׁ֔ה אֶל⁠־פְּנֵ֖י אֹ֣הֶל מוֹעֵ֑ד וַֽיִּקְרְבוּ֙ כׇּל⁠־הָ֣עֵדָ֔ה וַיַּֽעַמְד֖וּ לִפְנֵ֥י יְהֹוָֽהי״יֽ׃ (ו) וַיֹּ֣אמֶר מֹשֶׁ֔ה זֶ֧ה הַדָּבָ֛ר אֲשֶׁר⁠־צִוָּ֥ה יְהֹוָ֖הי״י֖ תַּעֲשׂ֑וּ וְיֵרָ֥א אֲלֵיכֶ֖ם כְּב֥וֹד יְהֹוָֽהי״יֽ׃ (ז) וַיֹּ֨אמֶר מֹשֶׁ֜ה אֶֽל⁠־אַהֲרֹ֗ן קְרַ֤ב אֶל⁠־הַמִּזְבֵּ֙חַ֙ וַעֲשֵׂ֞ה אֶת⁠־חַטָּֽאתְךָ֙ וְאֶת⁠־עֹ֣לָתֶ֔ךָ וְכַפֵּ֥ר בַּֽעַדְךָ֖ וּבְעַ֣ד הָעָ֑ם וַעֲשֵׂ֞ה אֶת⁠־קׇרְבַּ֤ן הָעָם֙ וְכַפֵּ֣ר בַּֽעֲדָ֔ם כַּאֲשֶׁ֖ר צִוָּ֥ה יְהֹוָֽהי״יֽ׃ (ח) וַיִּקְרַ֥ב אַהֲרֹ֖ן אֶל⁠־הַמִּזְבֵּ֑חַ וַיִּשְׁחַ֛ט אֶת⁠־עֵ֥גֶל הַחַטָּ֖את אֲשֶׁר⁠־לֽוֹ׃ (ט) וַ֠יַּקְרִ֠בוּ בְּנֵ֨י אַהֲרֹ֣ן אֶת⁠־הַדָּם֮ אֵלָיו֒ וַיִּטְבֹּ֤ל אֶצְבָּעוֹ֙ בַּדָּ֔ם וַיִּתֵּ֖ן עַל⁠־קַרְנ֣וֹת הַמִּזְבֵּ֑חַ וְאֶת⁠־הַדָּ֣ם יָצַ֔ק אֶל⁠־יְס֖וֹד הַמִּזְבֵּֽחַ׃ (י) וְאֶת⁠־הַחֵ֨לֶב וְאֶת⁠־הַכְּלָיֹ֜ת וְאֶת⁠־הַיֹּתֶ֤רֶת מִן⁠־הַכָּבֵד֙ מִן⁠־הַ֣חַטָּ֔את הִקְטִ֖יר הַמִּזְבֵּ֑חָה כַּאֲשֶׁ֛ר צִוָּ֥ה יְהֹוָ֖הי״י֖ אֶת⁠־מֹשֶֽׁה׃ (יא) וְאֶת⁠־הַבָּשָׂ֖ר וְאֶת⁠־הָע֑וֹר שָׂרַ֣ף בָּאֵ֔שׁ מִח֖וּץ לַֽמַּחֲנֶֽה׃ (יב) וַיִּשְׁחַ֖ט אֶת⁠־הָעֹלָ֑ה וַ֠יַּמְצִ֠אוּ בְּנֵ֨י אַהֲרֹ֤ן אֵלָיו֙ אֶת⁠־הַדָּ֔ם וַיִּזְרְקֵ֥הוּ עַל⁠־הַמִּזְבֵּ֖חַ סָבִֽיב׃ (יג) וְאֶת⁠־הָעֹלָ֗ה הִמְצִ֧יאוּ אֵלָ֛יו לִנְתָחֶ֖יהָ וְאֶת⁠־הָרֹ֑אשׁ וַיַּקְטֵ֖ר עַל⁠־הַמִּזְבֵּֽחַ׃ (יד) וַיִּרְחַ֥ץ אֶת⁠־הַקֶּ֖רֶב וְאֶת⁠־הַכְּרָעָ֑יִם וַיַּקְטֵ֥ר עַל⁠־הָעֹלָ֖ה הַמִּזְבֵּֽחָה׃ (טו) וַיַּקְרֵ֕ב אֵ֖ת קׇרְבַּ֣ן הָעָ֑ם וַיִּקַּ֞ח אֶת⁠־שְׂעִ֤יר הַֽחַטָּאת֙ אֲשֶׁ֣ר לָעָ֔ם וַיִּשְׁחָטֵ֥הוּ וַֽיְחַטְּאֵ֖הוּ כָּרִאשֽׁוֹן׃ (טז) וַיַּקְרֵ֖ב אֶת⁠־הָעֹלָ֑ה וַֽיַּעֲשֶׂ֖הָ כַּמִּשְׁפָּֽט׃ (יז) {שני} וַיַּקְרֵב֮ אֶת⁠־הַמִּנְחָה֒ וַיְמַלֵּ֤א כַפּוֹ֙ מִמֶּ֔נָּה וַיַּקְטֵ֖ר עַל⁠־הַמִּזְבֵּ֑חַ מִלְּבַ֖ד עֹלַ֥ת הַבֹּֽקֶר׃ (יח) וַיִּשְׁחַ֤ט אֶת⁠־הַשּׁוֹר֙ וְאֶת⁠־הָאַ֔יִל זֶ֥בַח הַשְּׁלָמִ֖ים אֲשֶׁ֣ר לָעָ֑ם וַ֠יַּמְצִ֠אוּ בְּנֵ֨י אַהֲרֹ֤ן אֶת⁠־הַדָּם֙ אֵלָ֔יו וַיִּזְרְקֵ֥הוּ עַל⁠־הַמִּזְבֵּ֖חַ סָבִֽיב׃ (יט) וְאֶת⁠־הַחֲלָבִ֖ים מִן⁠־הַשּׁ֑וֹר וּמִ֨ן⁠־הָאַ֔יִל^ב הָֽאַלְיָ֤ה וְהַֽמְכַסֶּה֙ וְהַכְּלָיֹ֔ת וְיֹתֶ֖רֶת הַכָּבֵֽד׃ (כ) וַיָּשִׂ֥ימוּ אֶת⁠־הַחֲלָבִ֖ים עַל⁠־הֶחָז֑וֹת וַיַּקְטֵ֥ר הַחֲלָבִ֖ים הַמִּזְבֵּֽחָה׃ (כא) וְאֵ֣ת הֶחָז֗וֹת וְאֵת֙ שׁ֣וֹק הַיָּמִ֔ין הֵנִ֧יף אַהֲרֹ֛ן תְּנוּפָ֖ה לִפְנֵ֣י יְהֹוָ֑הי״י֑ כַּאֲשֶׁ֖ר צִוָּ֥ה מֹשֶֽׁה׃ (כב) וַיִּשָּׂ֨א אַהֲרֹ֧ן אֶת⁠־יָדָ֛ו אֶל⁠־הָעָ֖ם וַֽיְבָרְכֵ֑ם וַיֵּ֗רֶד מֵעֲשֹׂ֧ת הַֽחַטָּ֛את וְהָעֹלָ֖ה וְהַשְּׁלָמִֽים׃ (כג) וַיָּבֹ֨א מֹשֶׁ֤ה וְאַהֲרֹן֙ אֶל⁠־אֹ֣הֶל מוֹעֵ֔ד וַיֵּ֣צְא֔וּ וַֽיְבָרְכ֖וּ^ג אֶת⁠־הָעָ֑ם וַיֵּרָ֥א כְבוֹד⁠־יְהֹוָ֖הי״י֖ אֶל⁠־כׇּל⁠־הָעָֽם׃ (כד) {שלישי} וַתֵּ֤צֵא אֵשׁ֙ מִלִּפְנֵ֣י יְהֹוָ֔הי״י֔ וַתֹּ֙אכַל֙ עַל⁠־הַמִּזְבֵּ֔חַ אֶת⁠־הָעֹלָ֖ה וְאֶת⁠־הַחֲלָבִ֑ים וַיַּ֤רְא כׇּל⁠־הָעָם֙ וַיָּרֹ֔נּוּ וַֽיִּפְּל֖וּ עַל⁠־פְּנֵיהֶֽם׃ נוסח המקרא מבוסס על מהדורת מקרא על פי המסורה (CC BY-SA 3.0), המבוססת על כתר ארם צובה וכתבי יד נוספים (רשימת מקורות וקיצורים מופיעה כאן), בתוספת הדגשת שוואים נעים ודגשים חזקים ע"י על־התורה

הערות

^א וַֽיְהִי֙ =ל-מ,ב,ו ושיטת-א (געיה) וכך הכריעו ברויאר ומג״ה
• ל,ל1,ש,ש1,ק3=וַיְהִי֙ (אין געיה)

^ב וּמִ֨ן⁠־הָאַ֔יִל =ל1,ב,ש?,ש1,ו ושיטת-א ובדפוסים
• ל,ק3=וּמִן⁠־הָאַ֔יִל (אין מתיגה)
• קורן, ברויאר, סימנים, מכון ממרא

^ג וַֽיְבָרְכ֖וּ =ש,ש1,ק3,ו ומ״ש
• ל,ל1,ב=וַֽיְבָרֲכ֖וּ (חטף)
• ברויאר, סימנים, מכון ממרא

כותרת הגיליון

כותרת הגיליון

כותרת הגיליון

כותרת הגיליון

Are you sure you want to delete this?

האם אתם בטוחים שאתם רוצים למחוק את זה?

Please Login

נא להתחבר לחשבונכם

Login!כניסה לחשבון