Targum Yerushalmi (Yonatan) Hebrew Translation Shemot 38 – תרגום ירושלמי (יונתן) מתורגם לעברית שמות לח‏ – Mikraot Gedolot

תנ״ך

פירוש

(א) {שביעי / רביעי במחוברות} ^אוַיַּ֛עַשׂ אֶת⁠־מִזְבַּ֥ח הָעֹלָ֖ה עֲצֵ֣י שִׁטִּ֑ים חָמֵשׁ֩ אַמּ֨וֹת אׇרְכּ֜וֹ וְחָֽמֵשׁ⁠־אַמּ֤וֹת רׇחְבּוֹ֙ רָב֔וּעַ וְשָׁלֹ֥שׁ אַמּ֖וֹת קֹמָתֽוֹ׃ (ב) וַיַּ֣עַשׂ קַרְנֹתָ֗יו עַ֚ל אַרְבַּ֣ע פִּנֹּתָ֔יו מִמֶּ֖נּוּ הָי֣וּ קַרְנֹתָ֑יו וַיְצַ֥ף אֹת֖וֹ נְחֹֽשֶׁת׃ (ג) וַיַּ֜עַשׂ אֶֽת⁠־כׇּל⁠־כְּלֵ֣י הַמִּזְבֵּ֗חַ אֶת⁠־הַסִּירֹ֤ת וְאֶת⁠־הַיָּעִים֙ וְאֶת⁠־הַמִּזְרָקֹ֔ת אֶת⁠־הַמִּזְלָגֹ֖ת וְאֶת⁠־הַמַּחְתֹּ֑ת כׇּל⁠־כֵּלָ֖יו עָשָׂ֥ה נְחֹֽשֶׁת׃ (ד) וַיַּ֤עַשׂ לַמִּזְבֵּ֙חַ֙ מִכְבָּ֔ר מַעֲשֵׂ֖ה רֶ֣שֶׁת נְחֹ֑שֶׁת תַּ֧חַת כַּרְכֻּבּ֛וֹ מִלְּמַ֖טָּה עַד⁠־חֶצְיֽוֹ׃ (ה) וַיִּצֹ֞ק אַרְבַּ֧ע טַבָּעֹ֛ת בְּאַרְבַּ֥ע הַקְּצָוֺ֖ת לְמִכְבַּ֣ר הַנְּחֹ֑שֶׁת בָּתִּ֖ים לַבַּדִּֽים׃ (ו) וַיַּ֥עַשׂ אֶת⁠־הַבַּדִּ֖ים עֲצֵ֣י שִׁטִּ֑ים וַיְצַ֥ף אֹתָ֖ם נְחֹֽשֶׁת׃ (ז) וַיָּבֵ֨א אֶת⁠־הַבַּדִּ֜ים בַּטַּבָּעֹ֗ת עַ֚ל צַלְעֹ֣ת הַמִּזְבֵּ֔חַ לָשֵׂ֥את אֹת֖וֹ בָּהֶ֑ם נְב֥וּב לֻחֹ֖ת עָשָׂ֥ה אֹתֽוֹ׃ (ח) וַיַּ֗עַשׂ אֵ֚ת הַכִּיּ֣וֹר נְחֹ֔שֶׁת וְאֵ֖ת כַּנּ֣וֹ נְחֹ֑שֶׁת בְּמַרְאֹת֙ הַצֹּ֣בְאֹ֔ת אֲשֶׁ֣ר צָֽבְא֔וּ פֶּ֖תַח אֹ֥הֶל מוֹעֵֽד׃ (ט) וַיַּ֖עַשׂ אֶת⁠־הֶחָצֵ֑ר לִפְאַ֣ת׀ נֶ֣גֶב תֵּימָ֗נָה קַלְעֵ֤י הֶֽחָצֵר֙ שֵׁ֣שׁ מׇשְׁזָ֔ר מֵאָ֖ה בָּאַמָּֽה׃ (י) עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָעַמּוּדִ֛ים^ב וַחֲשֻׁקֵיהֶ֖ם כָּֽסֶף׃ (יא) וְלִפְאַ֤ת צָפוֹן֙ מֵאָ֣ה בָֽאַמָּ֔ה עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָֽעַמּוּדִ֛ים וַחֲשֻׁקֵיהֶ֖ם כָּֽסֶף׃ (יב) וְלִפְאַת⁠־יָ֗ם קְלָעִים֙ חֲמִשִּׁ֣ים בָּֽאַמָּ֔ה עַמּוּדֵיהֶ֣ם^ג עֲשָׂרָ֔ה וְאַדְנֵיהֶ֖ם עֲשָׂרָ֑ה וָוֵ֧י הָעַמֻּדִ֛ים וַחֲשׁוּקֵיהֶ֖ם כָּֽסֶף׃ (יג) וְלִפְאַ֛ת קֵ֥דְמָה מִזְרָ֖חָה חֲמִשִּׁ֥ים אַמָּֽה׃ (יד) קְלָעִ֛ים חֲמֵשׁ⁠־עֶשְׂרֵ֥ה אַמָּ֖ה אֶל⁠־הַכָּתֵ֑ף עַמּוּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃ (טו) וְלַכָּתֵ֣ף הַשֵּׁנִ֗ית מִזֶּ֤ה וּמִזֶּה֙ לְשַׁ֣עַר הֶֽחָצֵ֔ר קְלָעִ֕ים חֲמֵ֥שׁ עֶשְׂרֵ֖ה אַמָּ֑ה עַמֻּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃ (טז) כׇּל⁠־קַלְעֵ֧י הֶחָצֵ֛ר סָבִ֖יב שֵׁ֥שׁ מׇשְׁזָֽר׃ (יז) וְהָאֲדָנִ֣ים לָֽעַמֻּדִים֮ נְחֹ֒שֶׁת֒ וָוֵ֨י הָֽעַמּוּדִ֜ים וַחֲשׁוּקֵיהֶם֙ כֶּ֔סֶף וְצִפּ֥וּי רָאשֵׁיהֶ֖ם כָּ֑סֶף וְהֵם֙ מְחֻשָּׁקִ֣ים כֶּ֔סֶף כֹּ֖ל עַמֻּדֵ֥י הֶחָצֵֽר׃ (יח) {מפטיר} וּמָסַ֞ךְ שַׁ֤עַר הֶחָצֵר֙ מַעֲשֵׂ֣ה רֹקֵ֔ם תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ מׇשְׁזָ֑ר וְעֶשְׂרִ֤ים אַמָּה֙ אֹ֔רֶךְ וְקוֹמָ֤ה בְרֹ֙חַב֙ חָמֵ֣שׁ אַמּ֔וֹת לְעֻמַּ֖ת קַלְעֵ֥י הֶחָצֵֽר׃ (יט) וְעַמֻּֽדֵיהֶם֙ אַרְבָּעָ֔ה וְאַדְנֵיהֶ֥ם אַרְבָּעָ֖ה נְחֹ֑שֶׁת וָוֵיהֶ֣ם כֶּ֔סֶף וְצִפּ֧וּי רָאשֵׁיהֶ֛ם וַחֲשֻׁקֵיהֶ֖ם כָּֽסֶף׃ (כ) וְֽכׇל⁠־הַיְתֵדֹ֞ת^ד לַמִּשְׁכָּ֧ן וְלֶחָצֵ֛ר סָבִ֖יב נְחֹֽשֶׁת׃ (כא) {פרשת פקודי} אֵ֣לֶּה פְקוּדֵ֤י הַמִּשְׁכָּן֙ מִשְׁכַּ֣ן הָעֵדֻ֔ת אֲשֶׁ֥ר פֻּקַּ֖ד עַל⁠־פִּ֣י מֹשֶׁ֑ה עֲבֹדַת֙ הַלְוִיִּ֔ם^ה בְּיַד֙ אִֽיתָמָ֔ר בֶּֽן⁠־אַהֲרֹ֖ן הַכֹּהֵֽן׃ (כב) וּבְצַלְאֵ֛ל בֶּן⁠־אוּרִ֥י בֶן⁠־ח֖וּר לְמַטֵּ֣ה יְהוּדָ֑ה עָשָׂ֕ה אֵ֛ת כׇּל⁠־אֲשֶׁר⁠־צִוָּ֥ה יְהֹוָ֖הי״י֖ אֶת⁠־מֹשֶֽׁה׃ (כג) וְאִתּ֗וֹ אׇהֳלִיאָ֞ב בֶּן⁠־אֲחִיסָמָ֛ךְ לְמַטֵּה⁠־דָ֖ן חָרָ֣שׁ וְחֹשֵׁ֑ב וְרֹקֵ֗ם בַּתְּכֵ֙לֶת֙ וּבָֽאַרְגָּמָ֔ן^ו וּבְתוֹלַ֥עַת הַשָּׁנִ֖י וּבַשֵּֽׁשׁ׃ (כד) כׇּל⁠־הַזָּהָ֗ב הֶֽעָשׂוּי֙ לַמְּלָאכָ֔ה בְּכֹ֖ל מְלֶ֣אכֶת הַקֹּ֑דֶשׁ וַיְהִ֣י׀ זְהַ֣ב הַתְּנוּפָ֗ה תֵּ֤שַׁע וְעֶשְׂרִים֙ כִּכָּ֔ר וּשְׁבַ֨ע מֵא֧וֹת וּשְׁלֹשִׁ֛ים שֶׁ֖קֶל בְּשֶׁ֥קֶל הַקֹּֽדֶשׁ׃ (כה) וְכֶ֛סֶף פְּקוּדֵ֥י הָעֵדָ֖ה מְאַ֣ת כִּכָּ֑ר וְאֶ֩לֶף֩ וּשְׁבַ֨ע מֵא֜וֹת וַחֲמִשָּׁ֧ה וְשִׁבְעִ֛ים שֶׁ֖קֶל בְּשֶׁ֥קֶל הַקֹּֽדֶשׁ׃ (כו) בֶּ֚קַע לַגֻּלְגֹּ֔לֶת מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ לְכֹ֨ל הָעֹבֵ֜ר עַל⁠־הַפְּקֻדִ֗ים מִבֶּ֨ן עֶשְׂרִ֤ים שָׁנָה֙ וָמַ֔עְלָה לְשֵׁשׁ⁠־מֵא֥וֹת אֶ֙לֶף֙ וּשְׁלֹ֣שֶׁת אֲלָפִ֔ים וַחֲמֵ֥שׁ מֵא֖וֹת וַחֲמִשִּֽׁים׃ (כז) וַיְהִ֗י מְאַת֙ כִּכַּ֣ר הַכֶּ֔סֶף לָצֶ֗קֶת אֵ֚ת אַדְנֵ֣י הַקֹּ֔דֶשׁ וְאֵ֖ת אַדְנֵ֣י הַפָּרֹ֑כֶת מְאַ֧ת אֲדָנִ֛ים לִמְאַ֥ת הַכִּכָּ֖ר כִּכָּ֥ר לָאָֽדֶן׃ (כח) וְאֶת⁠־הָאֶ֜לֶף וּשְׁבַ֤ע הַמֵּאוֹת֙ וַחֲמִשָּׁ֣ה וְשִׁבְעִ֔ים עָשָׂ֥ה וָוִ֖ים לָעַמּוּדִ֑ים וְצִפָּ֥ה רָאשֵׁיהֶ֖ם וְחִשַּׁ֥ק אֹתָֽם׃ (כט) וּנְחֹ֥שֶׁת הַתְּנוּפָ֖ה שִׁבְעִ֣ים כִּכָּ֑ר וְאַלְפַּ֥יִם וְאַרְבַּע⁠־מֵא֖וֹת שָֽׁקֶל׃ (ל) וַיַּ֣עַשׂ בָּ֗הּ אֶת⁠־אַדְנֵי֙ פֶּ֚תַח אֹ֣הֶל מוֹעֵ֔ד וְאֵת֙ מִזְבַּ֣ח הַנְּחֹ֔שֶׁת וְאֶת⁠־מִכְבַּ֥ר הַנְּחֹ֖שֶׁת אֲשֶׁר⁠־ל֑וֹ וְאֵ֖ת כׇּל⁠־כְּלֵ֥י הַמִּזְבֵּֽחַ׃ (לא) וְאֶת⁠־אַדְנֵ֤י הֶֽחָצֵר֙ סָבִ֔יב וְאֶת⁠־אַדְנֵ֖י שַׁ֣עַר הֶחָצֵ֑ר וְאֵ֨ת כׇּל⁠־יִתְדֹ֧ת הַמִּשְׁכָּ֛ן וְאֶת⁠־כׇּל⁠־יִתְדֹ֥ת הֶחָצֵ֖ר סָבִֽיב׃ נוסח המקרא מבוסס על מהדורת מקרא על פי המסורה (CC BY-SA 3.0), המבוססת על כתר ארם צובה וכתבי יד נוספים (רשימת מקורות וקיצורים מופיעה כאן), בתוספת הדגשת שוואים נעים ודגשים חזקים ע"י על־התורה

הערות

^א ‹סס› ל=פרשה פתוחה

^ב הָעַמּוּדִ֛ים =ל1,ב,ש,ש1,ק3,א ומסורות-א,ל וטברניות ורמ״ה (כתיב מלא וי״ו)
• ל!=הָעַמֻּדִ֛ים (כתיב חסר וי״ו) וכן במסורה קטנה בכתי״ל (!)

^ג עַמּוּדֵיהֶ֣ם =ב,ש,ש1,ק3,ו ובדפוסים
• ל?!=עַמּוּדֵיהֶ֥ם (בקו של טעם מרכא במקום מונח?) וכך הוא בהקלדה בעקבות BHS (ואולי רק נשמט הקו התחתון של טעם המונח בכתי״ל).

^ד וְֽכׇל⁠־הַיְתֵדֹ֞ת =ל1,ב,ש,ש1,ק3,ו ובדפוסים
• ל!=וְֽכׇל הַיְתֵדֹ֞ת (חסר מקף)

^ה הַלְוִיִּ֔ם =ב,ש,ש1,ק3,ו ובדפוסים
• ל=הַלְוִּיִּ֔ם (נקודה בוי״ו עיצורית) והמקליד תיקן בלי להעיר.

^ו וּבָֽאַרְגָּמָ֔ן =ל,ל1,ב,ק3,ו (געיה וטעם זקף קטן)
• ש,ש1=וּבָאַרְגָּמָ֔ן (אין געיה)
• דפוסים=וּבָ֣אַרְגָּמָ֔ן (מונח זקף קטן)

E/ע

הערותNotes

(א) ויעש את מזבח העולה עצי שטים חמש אמות אורכו וחמש אמות רוחבו רבוע וש לש אמות קומתו. (ב) ויעש קרנותיו על ארבע זויותיו ממנו היו קרנותיו זקופות למעלה ויצף אותו נחושת. (ג) ויעש את כל כלי המזבח את הסירות ואת היעים ואת המזרקות ואת המזלגות ואת המחתות לכל כליו עשה נחושת. (ד) ויעש למזבח מכבר מעשה רשת נחושת תחת היקפו מלמטה עד חציו כדי לקבל גחלים ועצמות שנופלים מן המזבח. (ה) ויצק ארבע טבעות בארבע זויותיו למכבר נחושת מקום לבדים. (ו) ויעש את הבדים עצי שיטים ויצף אותם נחושת. (ז) ויבא את הבדים בטבעות על צלעות המזבח לשאת אותו בהם חלול לוחות מלא עפר עשה אותו. (ח) ויעש את הכיור נחשת ואת כנו נחשת ממראות נחשת נשים הצנועות ובזמן שבאות להתפלל בפתח אהל מועד היו עומדות על קרבן דמיהן ומשבחות והודות ושבות לבעליהן ויולדות בנים צדיקים כאשר מיטהרות מטומאת דמיהן. (ט) ויעש את החצר לפאת צד דרום קלעי החצר שש משזר מאה אמה. (י) עמודיהם עשרים ואדניהם עשרים נחושת ווי העמודים וחשוקיהם כסף. (יא) ופאת צפון מאה אמה עמודיהם עשרים ואדניהם עשרים נחושת ווי העמודים וחשוקיהם כסף. (יב) ולפאת מערב קלעים חמשים אמה עמודיהם עשרה ואדניהם עשרה ווי העמודים וחשוקיהם כסף. (יג) ולפאת קדמה מזרחה חמשים אמה. (יד) קלעים חמש עשרה אמה לצד העמודים שלשה ואדניהם שלושה. (טו) ולצד השנית מזה ומזה לשער החצר קלעים חמש עשרה אמה עמודיהם שלשה ואדניהם שלשה. (טז) כל קלעי החצר סביב שש משזר. (יז) והאדנים לעמודים נחושת ווי העמודים וחשוקיהם כסף וציפוי ראשיהם כסף והם מחושקים כסף, כן היו נעשו כל עמודי החצר. (יח) ומסך שער החצר מעשה רקם מחט תכלת וארגמן ותולעת שני ושש משזר ועשרים אמה אורך וקומתו כרחבו חמש אמות כנגד קלעי החצר. (יט) ועמודיהם ארבעה ואדניהם ארבעה נחשת וויהם כסף וצפוי ראשיהם וחשוקיהם כסף. (כ) וכל היתדות למשכן ולחצר סביב נחושת. (כא) אלה מניני משקלם וסכומם של משכן העדות אשר נמנו על פי מאמרו של משה אבל עבודת הלויים היתה ביד איתמר בן אהרן הכהן. (כב) ובצלאל בן אורי בן חור לשבט יהודה עשה את כל אשר צוה י״י את משה. (כג) ואתו אהליאב בן אחיסמך לשבט דן חרש ואומן ורוקם בתכלת ובארגמן ובתולעת שני ובשש. (כד) כל הזהב שנעשה למלאכה בכל מלאכת הקדש ויהי סכום זהב התנופה תשע ועשרים ככר ושבע מאות ושלשים שקל בשקל הקדש זהו זהב התנופה אשר הרימו בני ישראל כל איש אשר נשא לבו לתרום. (כה) וכסף פקודי בני ישראל אשר נתנו בזמן שפקד אותם משה איש כפר נפשו מאת ככר ואלף ושבע מאות וחמשה ושבעים שקל בשקל הקדש. (כו) בקע לגולגולת מחצית השקל בשקל הקודש לכל מי שעבר על הפקודים מבן עשרים שנה ומעלה לשש מאות ושלשת אלפים וחמש מאות וחמשים. (כז) ויהי מאת ככר כסף לצקת את אדני הקודש ואת אדני הפרוכת מאה אדנים כנגד ככר ככר לאדן. (כח) ואת האלף ושבע מאות ושבעים וחמש שקל עשה ווים לעמודים וציפה ראשיהם וחשק אותם. (כט) ונחושת התנופה שבעים ככר ושני אלפים וארבע מאות שקל. (ל) ויעש בה את אדני פתח אהל מועד ואת מזבח הנחושת ואת מכבר הנחושת שלו ואת כל כלי המזבח. (לא) ואת אדני החצר סביב ואת אדני שער החצר ואת כל יתדות המשכן ואת כל יתדות החצר סביב. תרגום ספר "המליץ בינותם", באדיבות המתרגם (כל הזכויות שמורות)

הערות

E/ע

הערותNotes

הערות

Tanakh

Peirush

כותרת הגיליון

כותרת הגיליון

כותרת הגיליון

כותרת הגיליון

Are you sure you want to delete this?

האם אתם בטוחים שאתם רוצים למחוק את זה?

Please Login

נא להתחבר לחשבונכם

Login!כניסה לחשבון