×
Mikraot Gedolot Tutorial
תנ״ך
פירוש
הערותNotes
E/ע
מלכים ב ט׳תנ״ך
א֣
אָ
(א) וֶֽאֱלִישָׁע֙ הַנָּבִ֔יא קָרָ֕א לְאַחַ֖ד מִבְּנֵ֣י הַנְּבִיאִ֑ים וַיֹּ֨אמֶר ל֜וֹ חֲגֹ֣ר מׇתְנֶ֗יךָ וְ֠קַ֠ח פַּ֣ךְ הַשֶּׁ֤מֶן הַזֶּה֙ בְּיָדֶ֔ךָ וְלֵ֖ךְ רָמֹ֥ת גִּלְעָֽד׃ (ב) וּבָ֖אתָ⁠־שָּׁ֑מָּה וּרְאֵה⁠־שָׁ֠ם יֵה֨וּא בֶן⁠־יְהוֹשָׁפָ֜ט בֶּן⁠־נִמְשִׁ֗י וּבָ֙אתָ֙ וַהֲקֵֽמֹתוֹ֙ מִתּ֣וֹךְ אֶחָ֔יו וְהֵבֵיאתָ֥ אֹת֖וֹ חֶ֥דֶר בְּחָֽדֶר׃ (ג) וְלָקַחְתָּ֤ פַךְ⁠־הַשֶּׁ֙מֶן֙ וְיָצַקְתָּ֣ עַל⁠־רֹאשׁ֔וֹ וְאָֽמַרְתָּ֙ כֹּה⁠־אָמַ֣ר יְהֹוָ֔הי״י֔ מְשַׁחְתִּ֥יךָ לְמֶ֖לֶךְ אֶל⁠־יִשְׂרָאֵ֑ל וּפָתַחְתָּ֥ הַדֶּ֛לֶת וְנַ֖סְתָּה וְלֹ֥א תְחַכֶּֽה׃ (ד) וַיֵּ֧לֶךְ הַנַּ֛עַר הַנַּ֥עַר הַנָּבִ֖יא רָמֹ֥ת גִּלְעָֽד׃ (ה) וַיָּבֹ֗א וְהִנֵּ֨ה שָׂרֵ֤י הַחַ֙יִל֙ יֹֽשְׁבִ֔ים וַיֹּ֕אמֶר דָּבָ֥ר לִ֛י אֵלֶ֖יךָ הַשָּׂ֑ר וַיֹּ֤אמֶר יֵהוּא֙ אֶל⁠־מִ֣י מִכֻּלָּ֔נוּ וַיֹּ֖אמֶר אֵלֶ֥יךָ הַשָּֽׂר׃ (ו) וַיָּ֙קׇם֙ וַיָּבֹ֣א הַבַּ֔יְתָה וַיִּצֹ֥ק הַשֶּׁ֖מֶן אֶל⁠־רֹאשׁ֑וֹ וַיֹּ֣אמֶר ל֗וֹ כֹּֽה⁠־אָמַ֤ר יְהֹוָה֙י״י֙ אֱלֹהֵ֣י יִשְׂרָאֵ֔ל מְשַׁחְתִּ֧יךָ לְמֶ֛לֶךְ אֶל⁠־עַ֥ם יְהֹוָ֖הי״י֖ אֶל⁠־יִשְׂרָאֵֽל׃ (ז) וְהִ֨כִּיתָ֔ה אֶת⁠־בֵּ֥ית אַחְאָ֖ב אֲדֹנֶ֑יךָ וְנִקַּמְתִּ֞י דְּמֵ֣י׀ עֲבָדַ֣י הַנְּבִיאִ֗ים וּדְמֵ֛י כׇּל⁠־עַבְדֵ֥י יְהֹוָ֖הי״י֖ מִיַּ֥ד אִיזָֽבֶל׃ (ח) וְאָבַ֖ד כׇּל⁠־בֵּ֣ית אַחְאָ֑ב וְהִכְרַתִּ֤י לְאַחְאָב֙ מַשְׁתִּ֣ין בְּקִ֔יר וְעָצ֥וּר וְעָז֖וּב בְּיִשְׂרָאֵֽל׃ (ט) וְנָֽתַתִּי֙ אֶת⁠־בֵּ֣ית אַחְאָ֔ב כְּבֵ֖ית יָרׇבְעָ֣ם בֶּן⁠־נְבָ֑ט וּכְבֵ֖ית בַּעְשָׁ֥א בֶן⁠־אֲחִיָּֽה׃ (י) וְאֶת⁠־אִיזֶ֜בֶל יֹאכְל֧וּ הַכְּלָבִ֛ים בְּחֵ֥לֶק יִזְרְעֶ֖אל וְאֵ֣ין קֹבֵ֑ר וַיִּפְתַּ֥ח הַדֶּ֖לֶת וַיָּנֹֽס׃ (יא) וְיֵה֗וּא יָצָא֙ אֶל⁠־עַבְדֵ֣י אֲדֹנָ֔יו וַיֹּ֤אמֶר לוֹ֙ הֲשָׁל֔וֹם מַדּ֛וּעַ בָּֽא⁠־הַמְשֻׁגָּ֥ע הַזֶּ֖ה אֵלֶ֑יךָ וַיֹּ֣אמֶר אֲלֵיהֶ֔ם אַתֶּ֛ם יְדַעְתֶּ֥ם אֶת⁠־הָאִ֖ישׁ וְאֶת⁠־שִׂיחֽוֹ׃ (יב) וַיֹּאמְר֣וּ שֶׁ֔קֶר הַגֶּד⁠־נָ֖א לָ֑נוּ וַיֹּ֗אמֶר כָּזֹ֤את וְכָזֹאת֙ אָמַ֤ר אֵלַי֙ לֵאמֹ֔ר כֹּ֚ה אָמַ֣ר יְהֹוָ֔הי״י֔ מְשַׁחְתִּ֥יךָ לְמֶ֖לֶךְ אֶל⁠־יִשְׂרָאֵֽל׃ (יג) וַֽיְמַהֲר֗וּ וַיִּקְחוּ֙ אִ֣ישׁ בִּגְד֔וֹ וַיָּשִׂ֥ימוּ תַחְתָּ֖יו אֶל⁠־גֶּ֣רֶם הַֽמַּעֲל֑וֹת וַֽיִּתְקְעוּ֙ בַּשּׁוֹפָ֔ר וַיֹּאמְר֖וּ מָלַ֥ךְ יֵהֽוּא׃ (יד) וַיִּתְקַשֵּׁ֗ר יֵה֛וּא בֶּן⁠־יְהוֹשָׁפָ֥ט בֶּן⁠־נִמְשִׁ֖י אֶל⁠־יוֹרָ֑ם וְיוֹרָם֩ הָיָ֨ה שֹׁמֵ֜ר בְּרָמֹ֣ת גִּלְעָ֗ד ה֚וּא וְכׇל⁠־יִשְׂרָאֵ֔ל מִפְּנֵ֖י חֲזָאֵ֥ל מֶלֶךְ⁠־אֲרָֽם׃ (טו) וַיָּ֩שׇׁב֩ יְהוֹרָ֨ם הַמֶּ֜לֶךְ לְהִתְרַפֵּ֣א בְיִזְרְעֶ֗אל מִן⁠־הַמַּכִּים֙ אֲשֶׁ֣ר יַכֻּ֣הוּ אֲרַמִּ֔ים בְּהִלָּ֣חֲמ֔וֹ אֶת⁠־חֲזָאֵ֖ל מֶ֣לֶךְ אֲרָ֑ם וַיֹּ֤אמֶר יֵהוּא֙ אִם⁠־יֵ֣שׁ נַפְשְׁכֶ֔ם אַל⁠־יֵצֵ֤א פָלִיט֙ מִן⁠־הָעִ֔יר לָלֶ֖כֶת [לְהַגִּ֥יד] (לגיד) בְּיִזְרְעֶֽאל׃ (טז) וַיִּרְכַּ֤ב יֵהוּא֙ וַיֵּ֣לֶךְ יִזְרְעֶ֔אלָה כִּ֥י יוֹרָ֖ם שֹׁכֵ֣ב שָׁ֑מָּה וַֽאֲחַזְיָה֙ מֶ֣לֶךְ יְהוּדָ֔ה יָרַ֖ד לִרְא֥וֹת אֶת⁠־יוֹרָֽם׃ (יז) וְהַצֹּפֶה֩ עֹמֵ֨ד עַֽל⁠־הַמִּגְדָּ֜ל בְּיִזְרְעֶ֗אל וַיַּ֞רְא אֶת⁠־שִׁפְעַ֤ת יֵהוּא֙ בְּבֹא֔וֹ וַיֹּ֕אמֶר שִׁפְעַ֖ת אֲנִ֣י רֹאֶ֑ה וַיֹּ֣אמֶר יְהוֹרָ֗ם קַ֥ח רַכָּ֛ב וּֽשְׁלַ֥חא לִקְרָאתָ֖ם וְיֹאמַ֥ר הֲשָׁלֽוֹם׃ (יח) וַיֵּ֩לֶךְ֩ רֹכֵ֨ב הַסּ֜וּס לִקְרָאת֗וֹ וַיֹּ֙אמֶר֙ כֹּֽה⁠־אָמַ֤ר הַמֶּ֙לֶךְ֙ הֲשָׁל֔וֹם וַיֹּ֧אמֶר יֵה֛וּא מַה⁠־לְּךָ֥ וּלְשָׁל֖וֹם סֹ֣ב אֶֽל⁠־אַחֲרָ֑י וַיַּגֵּ֤ד הַצֹּפֶה֙ לֵאמֹ֔ר בָּא⁠־הַמַּלְאָ֥ךְ עַד⁠־הֵ֖ם וְלֹא⁠־שָֽׁב׃ (יט) וַיִּשְׁלַ֗ח רֹכֵ֣ב סוּס֮ שֵׁנִי֒ וַיָּבֹ֣א אֲלֵהֶ֔ם וַיֹּ֛אמֶר כֹּה⁠־אָמַ֥ר הַמֶּ֖לֶךְ שָׁל֑וֹם וַיֹּ֧אמֶר יֵה֛וּא מַה⁠־לְּךָ֥ וּלְשָׁל֖וֹם סֹ֥ב אֶֽל⁠־אַחֲרָֽי׃ (כ) וַיַּגֵּ֤ד הַצֹּפֶה֙ לֵאמֹ֔ר בָּ֥א עַד⁠־אֲלֵיהֶ֖ם וְלֹא⁠־שָׁ֑ב וְהַמִּנְהָ֗ג כְּמִנְהַג֙ יֵה֣וּא בֶן⁠־נִמְשִׁ֔י כִּ֥י בְשִׁגָּע֖וֹן יִנְהָֽג׃ (כא) וַיֹּ֤אמֶר יְהוֹרָם֙ אֱסֹ֔ר וַיֶּאְסֹ֖ר רִכְבּ֑וֹ וַיֵּצֵ֣א יְהוֹרָ֣ם מֶֽלֶךְ⁠־יִ֠שְׂרָאֵ֠ל וַאֲחַזְיָ֨הוּ מֶלֶךְ⁠־יְהוּדָ֜ה אִ֣ישׁ בְּרִכְבּ֗וֹ וַיֵּֽצְאוּ֙ לִקְרַ֣את יֵה֔וּא וַיִּ֨מְצָאֻ֔הוּ בְּחֶלְקַ֖ת נָב֥וֹת הַיִּזְרְעֵאלִֽי׃ (כב) וַיְהִ֗י כִּרְא֤וֹת יְהוֹרָם֙ אֶת⁠־יֵה֔וּא וַיֹּ֖אמֶר הֲשָׁל֣וֹם יֵה֑וּא וַיֹּ֙אמֶר֙ מָ֣ה הַשָּׁל֔וֹם עַד⁠־זְנוּנֵ֞י אִיזֶ֧בֶל אִמְּךָ֛ וּכְשָׁפֶ֖יהָ הָרַבִּֽים׃ (כג) וַיַּהֲפֹ֧ךְ יְהוֹרָ֛ם יָדָ֖יו וַיָּנֹ֑ס וַיֹּ֥אמֶר אֶל⁠־אֲחַזְיָ֖הוּ מִרְמָ֥ה אֲחַזְיָֽה׃ (כד) וְיֵה֞וּא מִלֵּ֧א יָד֣וֹ בַקֶּ֗שֶׁת וַיַּ֤ךְ אֶת⁠־יְהוֹרָם֙ בֵּ֣ין זְרֹעָ֔יו וַיֵּצֵ֥א הַחֵ֖צִי מִלִּבּ֑וֹ וַיִּכְרַ֖ע בְּרִכְבּֽוֹ׃ (כה) וַיֹּ֗אמֶר אֶל⁠־בִּדְקַר֙ שָׁלִשֹׁ֔ה שָׂ֚א הַשְׁלִכֵ֔הוּ בְּחֶלְקַ֕ת שְׂדֵ֖ה נָב֣וֹת הַיִּזְרְעֵאלִ֑י כִּֽי⁠־זְכֹ֞ר אֲנִ֣י וָאַ֗תָּה אֵ֣ת רֹכְבִ֤ים צְמָדִים֙ אַֽחֲרֵי֙ אַחְאָ֣ב אָבִ֔יו וַֽיהֹוָה֙י״י֙ נָשָׂ֣א עָלָ֔יו אֶת⁠־הַמַּשָּׂ֖א הַזֶּֽה׃ (כו) אִם⁠־לֹ֡א אֶת⁠־דְּמֵ֣י נָבוֹת֩ וְאֶת⁠־דְּמֵ֨י בָנָ֜יו רָאִ֤יתִֽי אֶ֙מֶשׁ֙ נְאֻם⁠־יְהֹוָ֔הי״י֔ וְשִׁלַּמְתִּ֥י לְךָ֛ בַּחֶלְקָ֥ה הַזֹּ֖את נְאֻם⁠־יְהֹוָ֑הי״י֑ וְעַתָּ֗ה שָׂ֧א הַשְׁלִכֵ֛הוּ בַּחֶלְקָ֖ה כִּדְבַ֥ר יְהֹוָֽהי״יֽ׃ (כז) וַאֲחַזְיָ֤ה מֶֽלֶךְ⁠־יְהוּדָה֙ רָאָ֔ה וַיָּ֕נׇס דֶּ֖רֶךְ בֵּ֣ית הַגָּ֑ן וַיִּרְדֹּ֨ף אַחֲרָ֜יו יֵה֗וּא וַ֠יֹּ֠אמֶר גַּם⁠־אֹת֞וֹ הַכֻּ֣הוּ אֶל⁠־הַמֶּרְכָּבָ֗ה בְּמַֽעֲלֵה⁠־גוּר֙ אֲשֶׁ֣ר אֶֽת⁠־יִבְלְעָ֔ם וַיָּ֥נׇס מְגִדּ֖וֹ וַיָּ֥מׇת שָֽׁם׃ (כח) וַיַּרְכִּ֧בוּ אֹת֛וֹ עֲבָדָ֖יו יְרוּשָׁלָ֑͏ְמָה וַיִּקְבְּר֨וּ אֹת֧וֹ בִקְבֻרָת֛וֹ עִם⁠־אֲבֹתָ֖יו בְּעִ֥יר דָּוִֽד׃ (כט) וּבִשְׁנַת֙ אַחַ֣ת עֶשְׂרֵ֣ה שָׁנָ֔ה לְיוֹרָ֖ם בֶּן⁠־אַחְאָ֑ב מָלַ֥ךְ אֲחַזְיָ֖ה עַל⁠־יְהוּדָֽה׃ (ל) וַיָּב֥וֹא יֵה֖וּא יִזְרְעֶ֑אלָה וְאִיזֶ֣בֶל שָֽׁמְעָ֗ה וַתָּ֨שֶׂם בַּפּ֤וּךְ עֵינֶ֙יהָ֙ וַתֵּ֣יטֶב אֶת⁠־רֹאשָׁ֔הּ וַתַּשְׁקֵ֖ף בְּעַ֥ד הַחַלּֽוֹן׃ (לא) וְיֵה֖וּא בָּ֣א בַשָּׁ֑עַר וַתֹּ֣אמֶר הֲשָׁל֔וֹם זִמְרִ֖י הֹרֵ֥ג אֲדֹנָֽיו׃ (לב) וַיִּשָּׂ֤א פָנָיו֙ אֶל⁠־הַ֣חַלּ֔וֹן וַיֹּ֕אמֶר מִ֥י אִתִּ֖י מִ֑י וַיַּשְׁקִ֣יפוּ אֵלָ֔יו שְׁנַ֥יִם שְׁלֹשָׁ֖ה סָרִיסִֽים׃ (לג) וַיֹּ֥אמֶר [שִׁמְט֖וּהָ] (שמטהו) וַֽיִּשְׁמְט֑וּהָ וַיִּ֨ז מִדָּמָ֧הּ אֶל⁠־הַקִּ֛יר וְאֶל⁠־הַסּוּסִ֖ים וַֽיִּרְמְסֶֽנָּה׃ (לד) וַיָּבֹ֖א וַיֹּ֣אכַל וַיֵּ֑שְׁתְּ וַיֹּ֗אמֶר פִּקְדוּ⁠־נָ֞א אֶת⁠־הָאֲרוּרָ֤ה הַזֹּאת֙ וְקִבְר֔וּהָ כִּ֥י בַת⁠־מֶ֖לֶךְ הִֽיא׃ (לה) וַיֵּלְכ֖וּ לְקׇבְרָ֑הּ וְלֹא⁠־מָ֣צְאוּ בָ֗הּ כִּ֧י אִם⁠־הַגֻּלְגֹּ֛לֶת וְהָרַגְלַ֖יִם וְכַפּ֥וֹת הַיָּדָֽיִם׃ (לו) וַיָּשֻׁבוּ֮ וַיַּגִּ֣ידוּ לוֹ֒ וַיֹּ֙אמֶר֙ דְּבַר⁠־יְהֹוָ֣הי״י֣ ה֔וּא אֲשֶׁ֣ר דִּבֶּ֗ר בְּיַד⁠־עַבְדּ֛וֹ אֵלִיָּ֥הוּ הַתִּשְׁבִּ֖י לֵאמֹ֑ר בְּחֵ֣לֶק יִזְרְעֶ֔אל יֹאכְל֥וּ הַכְּלָבִ֖ים אֶת⁠־בְּשַׂ֥ר אִיזָֽבֶל׃ (לז) [וְֽהָיְתָ֞ה] (והית) נִבְלַ֣ת אִיזֶ֗בֶל כְּדֹ֛מֶן עַל⁠־פְּנֵ֥י הַשָּׂדֶ֖ה בְּחֵ֣לֶק יִזְרְעֶ֑אל אֲשֶׁ֥ר לֹא⁠־יֹאמְר֖וּ זֹ֥את אִיזָֽבֶל׃ נוסח המקרא מבוסס על מהדורת מקרא על פי המסורה (CC BY-SA 3.0), המבוססת על כתר ארם צובה וכתבי יד נוספים (רשימת מקורות וקיצורים מופיעה כאן), בתוספת הדגשת שוואים נעים ודגשים חזקים ע"י על־התורה
הערות
א וּֽשְׁלַ֥ח א=וּֽשֲׁלַ֥ח (חטף)
E/ע
הערותNotes
(א) ויאמר לו חגור מתניך – צוהו לחגור מתניו כדי שיוכל לרוץ.
ולך רמות גלעד – ידמה שלקחוה מיד מלך ארם אחרי מות אחאב או בעת מות אחאב כי אז הצליחו ישראל במלחמה אלא שכבר מת אחאב והנה היה בזה העת חיל ישראל שם.
(ב) והבאת אותו חדר בחדר – צוהו זה כדי שלא ישמע אדם דבריו. (ג) ונסתה ולא תחכה – רוצה לומר: שלא תמתין לנוס אבל תנוס תכף השלימך הדברים והנה קצר בכאן ולא זכר הדברים שאמר אלישע שיאמר ליהוא אך מדבריו ליהוא למדנו שכבר צוהו אלישע לומר אותן הדברי׳. (יא) ויאמר לו השלום – רוצה לומר: שכבר אמר לו זה אחד מהשרים אשר שם וחקר עמו אם הדבר שדבר אליו הוא שלום או הפך כי רגילי׳ היו הנביאים ליעד רע לישראל והנה קראו הנביא משוגע לפי שמרוב התבודדות שכלם בש״י היו שוגים בשאר הענינים.
אתם ידעתם את האיש ואת שיחו – רוצה לומר: אתם מכירים את האיש ואת דבריו שאין בהם ממש ולזה אין לכם לחקור על דבריו כי לא אמר דבר שיהי׳ לו שורש.
(יב) ויאמרו שקר הגד נא לנו – רוצה לומר: הנה דבריך הם שקר הגד נא לנו מה אמר לך כי דבר סוד אמר אליך. (יג) וימהרו ויקחו איש בגדו – רוצה לומר: שכל אחד מהשרים אשר שם לקח בגדו ושמהו תחת יהוא לעוצם המעלות אשר העלוהו שם כדי שיהיה גבוה מאד על כלם כמשפט המלך. (יד) ויתקשר יהוא בן יהושפט – רוצה לומר שהתקש׳ עם השרים אשר שם כנגד יורם וזכר כי סבת זה הקשר היה היות יורם מוכה ברמות גלעד כי לולי זה כבר היה שומר ברמות גלעד וכל ישראל מפני חזאל שהיה רוצה לכבוש רמות גלעד ומפני יראת השרים ממנו לא היה אפשר אז כל זה אך קרה שהוכה שם והוכרח מפני זה ללכת ביזרעאל וזה ממה שהישיר הדרך אל זה הקשר.
אם יש נפשכם – רצה לומר אם רצונכם להחזק בקשר הזה לא יצא שום אדם מן העיר שיוכל להגיד זה ביזרעאל כי זה יהיה סבה אל שיחזק יורם לנגדי ולא נוכל לעשות הדרוש ממנו.
(יז) וירא את שפעת יהוא – רוצה לומר: שפע עם שהיה בא עם יהוא.
קח רכב ושלח לקראתם – רוצה לומר: רוכב סוס.
(יח) מה לך ולשלום סוב אל אחרי – עש׳ זאת כדי שלא ידע המלך דב׳ בזה כדי שיתכן לו יותר להמיתו. (כ) והמנהג כמנהג יהוא – רוצה לומר: מנהג המלך אשר היה רוכב בו והוא היה נוהג מנהג יהוא כי הוא רכבו בשגעון בזולת ישוב. (כג) ויהפך יהורם ידו וינס – רוצה לומר: שכב׳ היה נס לשוב ליזרעאל אך מהר יהוא וירה לו חץ והכהו מאחוריו בין זרועיו ויצא מלבו ומת לשעתו וכרע ברכבו ואמר יהוא לבדקר שהיה השליש שלו שישא נבלת יורם וישליכהו בחלקת שדה נבות היזרעאלי ר״ל במקום אשר סוקל שם נבות. (כה) אני ואתה את רוכבים צמדים אחרי אחאב אביו – רוצה לומר: שאני ואתה היינו יחד את רוכבים אחרים מחוברים והולכים אחרי אחאב אביו. (כו) אם לא את דמי נבות ואת דמי בניו ראיתי אמש – אמר דמי בניו העתידים לצאת ממנו כמו שבארנו במה שקדם ואמר אליהו לו בדבר י״י שכבר ראה בלילה שעבר קודם מצאו אותו דמי נבות שהומת בעבור שלא רצה למכור כרמו או להחליפו. (כז) ואחזיהו מלך יהודה ראה וינס – ספר בד״ה שכבר היה אחזיהו מתחבא בשמרון ויביאוהו אל יהוא ואולם קצר בזה המקום והנה כשהביאוהו אל יהוא אמר להם שיכוהו אל המרכבה בחצים והנה אמר להם זה בהיותו בעליית גור אשר את יבלעם ושם הכוהו בחצים ונס מוכה אל מגדו וימת שם והנה זכה לקבורה מפני היותו בן יהושפט אשר דרש את י״י בכל לבו כמו שנזכר בספר ד״ה. (ל) ותשם בפוך עיניה – רוצה לומר: שכבר קשטה את עצמה ושמה פוך בעיניה להיטיב ראותה אולי עשתה כדי שתשא חן בעיניו ויחמול עליה ולא יהרגנה או עשתה זה להחזיק המלוכה עדיין והוא יותר נכון ולזה אמרה בגאוה ליהוא השלום זמרי הורג אדניו. (לג) שמטוהו – כתוב שמטוה קרי והכתוב שב אל גוף איזבל כאילו יאמר שמטו גופה כדי שיפילוהו לארץ וזהו סקילה כמו שסוקל נבות כי הסקילה היא אם בשליכת אבנים על הנסקל או ביריית הנסקל על האבן כאמרו כי סקול יסקל או ירה יירה והנה זה היה מדה כנגד מדה.
וירמסנה – רמס אותה יהוא אחרי נפלה להמיתה בשלמות ולקיים מה שנאמר והיתה נבלת איזבל כדמן על פני השדה.
(לו) בחלק יזרעאל – ידמה שבכרם נבות נפלה ושם אכלו בשדה הכלבי׳ כי אצל בית אחאב היה כרם נבות. רשימת מהדורות
© כל הזכויות שמורות. העתקת קטעים מן הטקסטים מותרת לשימוש אישי בלבד, ובתנאי שסך ההעתקות אינו עולה על 5% של החיבור השלם.
List of Editions
© All rights reserved. Copying of paragraphs is permitted for personal use only, and on condition that total copying does not exceed 5% of the full work.
הערות
E/ע
הערותNotes
הערות
Tanakh
Peirush

כותרת הגיליון

כותרת הגיליון

×

Are you sure you want to delete this?

האם אתם בטוחים שאתם רוצים למחוק את זה?

×

Please Login

One must be logged in to use this feature.

If you have an ALHATORAH account, please login.

If you do not yet have an ALHATORAH account, please register.

נא להתחבר לחשבונכם

עבור תכונה זו, צריכים להיות מחוברים לחשבון משתמש.

אם יש לכם חשבון באתר על־התורה, אנא היכנסו לחשבונכם.

אם עדיין אין לכם חשבון באתר על־התורה, אנא הירשמו.

×

Login!כניסה לחשבון

If you already have an account:אם יש ברשותכם חשבון:
Don't have an account? Register here!אין לכם חשבון? הרשמו כאן!
×
שלח תיקון/הערהSend Correction/Comment
×